आईपीएल २०२०ः पन्जाबद्वारा कोलकाता पराजित, आज हैदराबाद र दिल्ली भिड्दै

  •  
  •  
  •  
  •  
  • 6
  •  
    6
    Shares

काठमाडौं – युएईमा जारी आईपीएल क्रिकेट अन्तर्गतको आफ्नो १२ औं खेलमा किंग्स इलाभेन पन्जाबले कोलकाता नाइटराइडर्सलाई आठ विकेटले हराएको छ ।

जितका लागि पाएको १५० रनको लक्ष्य पन्जाबका मन्दीप सिंह र क्रिस गेलले १०० रनको साझेदारी गर्दै १९ औं ओभरमा २ विकेट गुमाएर पुरा गरेका थिए ।

मन्दीप सिंहले नटआउट ६६ र क्रिस गेलले ५१ रन बनाए । पाँच छक्का र दुई चौका प्रहार गरेका गेल म्यान अफ द म्याच भए ।

जारी आईपीएलको १३ औं संस्करणमा यो पन्जाबको छैठौं जित र कोलकाताको छैटौं हार हो । जितसँगै पन्जाब १२ अंकसहित अंक तालिकाको चौथो नम्बरमा पुगेको छ ।

यसअघि टस हारेर ब्याटिङ गरेको कोलकाता नाइट राइडर्सले निर्धारत २० ओभरमा नौ विकेट गुमाएर १४९ रन बनाएको थियो । शुभमन गिलले अर्धशतक बनाए । कोलकाताको लागि गिलको अलावा कप्तान इयान मोर्गन र लकी फर्ग्युसनले मात्र राम्रो खेल्न सके । अरुले दोहोरो अंकको स्कोर बनाउन सकेनन् ।

शुरुवाती दुई ओभर खेल्दा तीन विकेट गुमेर १० रनमा रहेको अवस्थामा गिल र फर्ग्युसनले ८१ रनको साझेदारी गरे । गिलले ५७ रन बनाए । नवौं नम्बरमा ब्याटिङमा आएका फर्ग्युसनले १२ बलमा नटआउट २४ रन बनाए । यसअघि मोर्गनले २५ बलमा ४० रन जोडेका थिए ।

पन्जाबका लागि मोहम्मद शामीले ३ विकेट लिए । क्रिस जोर्डन र रबि बिश्नोईले २–२ तथा ग्लेन म्याक्सवेल र मुरुगन आश्विनले एक–एक विकेट लिए । आज सनराईज हैदराबाद र दिल्ली क्यापिटल्सबीच खेल हुँदैछ ।


  •  
  •  
  •  
  •  
  • 6
  •  
    6
    Shares